食環署員工返工吞泡早就出晒名，本報以前曾經踢爆，佢哋喺返工時間不務正業，歎茶健身瞓大覺，應有盡有。事情曝光後，輿論嘩然，署方實牙實齒應承追究，點知只行雷唔落雨，查查吓就冇晒下文。而嗰啲蛇王就變本加厲，以前仲偷偷摸摸，家陣肆無忌憚，齊齊吞泡，食環署直情淪為蛇王竇。嗱，最近本報踢爆嘅集體劈酒玩骰盅事件，就夠晒混帳。

件事係咁嘅，食環署黃大仙分處有班員工，每逢假日值班，食晏都食到鬼咁耐，仲齊齊劈酒、玩骰盅、睇跑馬。更離譜嘅係，佢哋居然喺全面禁煙嘅熟食中心煲煙，搞到烏煙瘴氣。有食客睇唔過眼向本報報料，本報記者多次追蹤調查，將呢班蛇王嘅醜態影相為證，然後將事件轉介畀食環署跟進。

人贓並獲，食環署唔可以當冇事喇啩，今次班蛇王仲走得甩咩！冇錯，署方今次的確唔夠膽硬頂，死死氣應承調查，但係就推三推四，開頭話涉事人張相打咗格，好難確認身份。後來本報根據食環署內部員工報料，確認涉事員工嘅姓名職位，將資料轉介畀署方，署方先至唔敢再撐，但係又話需要時間調查咁話。

講到署方嘅調查，仲激到你抽筋。知唔知叫邊個調查呀？原來將個波踢畀疑似蛇王任職嘅黃大仙分處。嘩，咁咪即係自己查自己，唔使問阿貴都係扯貓尾啦。果不其然，查咗成個月，乜都查唔到，署方發言人更係一問三不知。

其實，有咁嘅結果並唔奇，事關食環署署長卓永興不嬲對署內嘅歪風邪氣隻眼開隻眼閉，對蛇王事件更係見怪不怪。奇就奇在，涉事員工唔單止冇被處分，仲有份升職加薪。嘩，咁仲有天理嘅！擺到明係獎懶罰勤，嗰啲努力工作嘅員工點會服氣呀。難怪好多人狂炳署方大細超。

叮！署方獎懶罰勤，員工邊會有士氣吖，唔怪得由上到下都成盤散沙咁款啦。遠嘅唔講，就講嗰啲滅鼠隊，成百人咁多，可惜往往連條老鼠毛都捉唔到，搞到香港鼠患成災，咬傷外國遊客，鬧出國際大笑話。

大家咪見到卓永興等人對蛇王員工網開一面，就以為佢哋係菩薩心腸。佢哋對自己友先至係咁咋，對嗰啲又老又弱又殘嘅小販就兇神惡煞，就算人哋跪地苦苦哀求，都一於冇面畀。

正如毛伯伯話齋，世上冇無緣無故嘅愛，亦冇無緣無故嘅恨。卓永興等人倒行逆施，有乜法子唔搞到天怒人怨呀。叮！