中央官員走親民路線

中央官員近年走親民路線，人稱「喬老爺」嘅全國人大常委會副秘書長喬曉陽尋日就做咗一個完美嘅示範嘞。全國人大常委會第十六次會議尋日開幕，喬老爺盡地主之誼，中午宴請全國人大常委范徐麗泰、基本法委員會副主任梁愛詩，同埋田二少、王敏剛等六名上京列席會議嘅港區全國人大代表。

當喬老爺同大家食到下半段時，房門突然打開，一個插住一支火燄棒嘅生日蛋糕緩緩推入嚟，席上人人一臉錯愕，然後係一陣笑聲，笑得最燦爛嗰個當然係田二少啦，因為喬老爺呢個時候亦起身走向田二少，話：「祝生辰快樂！」冧到田二少差啲暈低。田二少事後話喬老爺咁大個驚喜令佢受寵若驚。