尋日下晝見到「玩具大王」蔡志明嘅太太同閨中密友逛ifc掃貨，見蔡太着住豹紋乾濕褸，戴上黑超，拎住新款Valentino手袋，打扮令人眼前一亮。近排各大名店減緊價，但蔡太兜咗幾圈都係冇心水。
記者上前打招呼，蔡太話旗下幼稚園臨近九月開學，家長爭崩頭報名，佢唔敢行開，所以暑假冇出門，一路留喺香港。不過老公好有心思，知道老婆鍾情豹紋設計嘅衣服同首飾，早前買咗隻繪有花豹嘅瑞士鑽石名錶SARCAR畀佢，佢早前就戴住呢隻錶出席保良局傳媒午宴。
SARCAR以製作「會轉動的鑽石錶」聞名於世，蔡太手上嗰隻就有三粒會轉動嘅巨鑽，配埋栩栩如生嘅花豹圖案同豹紋錶帶，野性得嚟有貴氣。問起隻錶嘅價錢，佢話：「老公送嘅，價錢？唔知喎。」