近期政策不利營商

Jeffrey炮轟近期特區政府嘅政策，包括啱啱過咗嘅最低工資，同埋嚟緊嘅公平競爭法，都不利營商，更令工商界變成一大群墮後晒嘅蝸牛，想行前都行唔到。佢希望各商界人士團結一致，多啲發表自己嘅意見，為社會做啲嘢。

肥胡講得仲白，話商界人士習慣唔出聲，令好多人都反對商家，搞到社會變得兩極化。佢直言依家社會有一成係保皇黨，一成係反對派，剩低嘅八成好多都係商界或專業界人士，偏偏作為主流嘅佢哋卻係沉默嘅一群。佢話經濟同民生息息相關，呼籲大家要多啲發表意見咁話。

仲記得喺幾個禮拜之前，中聯辦副主任黎桂康先罕有咁發表書面講話，敦促本港嘅工商界團結，同埋及早謀劃未來參政嘅角色，肥胡尋日同Jeffrey唱雙簧，擺明就係呼應黎桂康嘅講話。

但要商界人士多啲參政，呢個如意算盤都唔易打響。中華廠商會會長黃友嘉尋日就話商界人士一向務實，鍾意埋頭苦幹同保持沉默，仲話：「你話議員、社工呀嗰啲就唔同啫，佢哋嘅職責係要講嘢嘛！我哋都唔係。」佢希望大家唔好一竹篙打一船人，當晒所有商人同所有政府幫手推動經濟發展嘅政策都係衰嘢喎！