港人愛食雞，製法五花八門，新加坡正宗風味「海南雞飯」月前登陸香港，廠商會副會長施榮懷就相約北京市政協兼腸胃及肝臟科專科醫生Benjamin王振宇同埋擔任東華三院副主席嘅細佬施榮恆，齊齊去銅鑼灣「海南少爺」試菜，仲邊食邊向老闆偷師添！
三人一坐低，菜館老闆Tony鄭相賢已端上幾款鎮店招牌菜，包括特色沙律「新加坡蘿惹」、「肉骨茶煲」同「炒黑蘿蔔糕」，當然唔少得著名嘅「招牌海南少爺雞飯」啦。施榮懷趁機請教煮雞秘方，Tony破例「過招」，秘訣係煮雞前預備一鍋用多隻嫩雞匯聚成嘅精華，即係「雞膽」，大廚將新鮮雞放入「雞膽」內浸熟再過冷河，雞皮會變得香脆，肉質嫩滑。
煮雞飯更係學問多，Tony嚴選泰國香米，且新舊米並用；煮飯時更喺飯鍋內加入薑、蒜、斑蘭葉等材料調味，所以粒粒都有飯香。