台數位市長先後訪港

兩岸關係早就大吹暖風，但係特區政府後知後覺，拖到今年四月至宣布成立高層次嘅「港台經濟文化合作協進會」（協進會），由財爺鬍鬚曾做榮譽主席，同台灣就成立對口單位「台港經濟文化合作策進會」（策進會），加強兩地交流，但都已經落後咗好多啦！

打從協進會成立當日，鬍鬚曾就話好想盡快訪問台灣，但幾個月嚟咪話只聞樓梯響，就連一啲聲氣都冇，淨係知道開過會，傾咗啲乜冇人知。

政府打鑼打鼓咁話要促進港台關係，但實際上就歎慢板，反而台灣方面仲積極啲，幾個市長先後訪港，但政府官員訪台就少得可憐，先係掹車邊跟佛學團體訪台嘅民政事務局局長曾德成，後來就有政制事務局局長「林公公」林瑞麟孖住商務及經濟發展局局長劉吳惠蘭，但都唔見有乜成果。

正如台灣傳媒一連三日係咁炒熱鬍鬚曾會喺月底訪台，但政府嘅態度比較冷淡，講嚟講去都係三幅被，話鬍鬚曾好想盡快去，直至尋日台灣媒體嘅報道唔單止有埋鬍鬚曾訪台嘅日子，仲列出具體行程，期間策進會董事長林振國會喺台北宴請佢，雙方仲會簽署文件，推進台港關係發展，亦會同陸委會主委賴幸媛等人見面等。

落實行程仍保密細節

然而，鬍鬚曾尋日朝早喺政府總部回應記者有關提問時仲係滴水不漏，淨係重申希望出訪台灣，就商貿文化各方面加強溝通，又話會盡快安排行程，有消息時會公布。

呢頭懶神秘咁，嗰頭係下晝五點新聞處就出稿，公布鬍鬚曾會喺本月二十八號至八月三十一號訪台，促進兩地交流，行程包括以協進會榮譽主席身份列席協進會同策進會首次聯合會議，並作嘉賓致辭，亦會喺協進會舉辦嘅商界午宴做主題演說，而訪台期間會同當地各界人士會面，又會參觀台灣企業、文化同旅遊觀光等設施。

咁佢會同當地乜嘢人士會面？新聞稿並冇披露。其實，既然都落實咗訪台行程，竟然都收收埋埋，鬍鬚曾未免太閃縮喇！唔知佢驚乜呢？