一億五千萬買斷三個概念方案，係唔係物有所值，見仁見智，不過咁，相對於成個西九大計嘅幾百億元投資嚟講，呢啲都係濕濕碎，大家最緊要睇實成盤數，唔好畀當局做大花筒，洗腳唔抹腳。而講到呢三個方案，例牌又係眾說紛紜，好難講邊個好邊個唔好。當局話喎，今次諮詢唔係零和比賽，而係會將三個方案糅合成一個終極方案，希望咁樣可以吸納所有方案嘅「亮點」，集各家精華，得到一份理想藍圖。

叮，講就講得幾有道理喇，但事實係咪咁，大家都唔知。其實，三名設計師都有自己嘅意念同風格，夾硬將唔同風格嘅設計概念攪埋一堆，隨時令西九淪為不倫不類嘅三不像。更何況，每個設計都有自己嘅整體性，將佢哋斬件出售，只會弄巧反拙。你估係合成電腦美女，攞咗A嘅眼、B嘅嘴、C嘅鼻、D嘅身材拼埋一齊，就合成一個沉魚落雁、閉月羞花嘅大美人咩。正如有立法會議員話齋，糅合方案係侮辱設計團隊，政府如果識得尊重原創，就唔會拼拼埋埋當畀碗車仔麵你食就算。

咁簡單嘅道理，唔使講都明啦。可惜成班高官既唔識藝術，又唔懂文化，偏偏要附庸風雅，學人哋搞乜嘢世界級文化藝術殿堂，唔搞到唔湯唔水至奇。叮！

話時話，西九文化區真係多災多難，當年揀咗個所謂天幕嘅設計方案，點知劣評如潮，甚至引起「利益輸送、官商勾結」嘅質疑，卒之要推倒重來。咁樣一推倒，眨吓眼又拖咗幾年，家陣先至搞第二階段諮詢，出年仲有第三階段諮詢添，咁搞法，設計方案都唔知幾時先至可以定落嚟，而講到動工咯喎，更加係遙遙無期。

港府吹水唔抹嘴，講就天下無敵，做就有心冇力，樣樣都慢人幾拍。本港提出西九大計嗰陣，新加坡嘅賭場連意念都未有，家陣人哋嘅賭場早就落成搵緊真金白銀嘞，而香港嘅西九文化區仲喺度紙上談兵。唔怕唔識貨，只怕貨比貨，你話香港人係咪可悲呀。

有人講笑咁講，西九都唔使搞到咁複雜嘞，不如趁地皮有價，賣鬼咗佢算數啦，閒閒地可以袋一千幾百億，用嚟扶貧又好，還富於民亦好，點都好過搞埋啲不倫不類嘅三不像吖！叮！