- 2010年08月22日(日)
英國係香港學生留學嘅最熱門選擇,尋日一連兩日嘅英國教育展開幕,吸引唔少家長同子女去參觀,連前社會福利署署長、現任勞工及福利局常任秘書長鄧國威都有出席,佢身邊仲有一個女士同兩名十餘歲少女,好似一家人咁,我哋想了解佢係咪要送女去英倫求學,點知鄧常秘反應好大,即刻攞副黑超出嚟戴上原本嘅近視眼鏡上,好似戴兩副眼鏡就冇人認出咁。
佢身邊嗰位女士亦幾乎同時彈開。鄧常秘仲戴黑超即刻離開展場,又唔肯回應我哋嘅問題。我哋透過勞福局發言人,問鄧國威尋日係咪同太太、女兒去教育展,係咪打算送個女去英國讀書;勞福局發言人回覆話,鄧國威係去咗一個展覽,至於其他問題就唔答。其實高官送仔女出國讀書都唔係新鮮事,鄧國威嘅反應會唔會過敏咗啲呢?
| ||||||||||||||||