西九文化區正進行第二階段諮詢，日前首次展出三位國際級建築大師嘅概念設計圖則時，久未公開露面嘅行政會議成員兼西九管理局成員夏佳理（Ron）亦帶埋太太到場觀賞，仲玩咗幾吓由三位大師團隊設計嘅電腦互動遊戲。
場中另有一對夫妻檔，立法會西九小組委員會成員涂謹申亦係其中一位首批獲邀到場參觀嘅嘉賓，撞啱佢太太蘇麗芬亦喺現場，不過兩人全程無接觸，事關本身做政治公關嘅涂太，前日係以西九公關身份在場工作，或者係咁，佢哋自己避嫌啩。
阿涂話比較欣賞雷姆．庫哈斯嘅「文化 新尺度」設計，但唔係因為佢最靚，而係貪佢建議起條橋駁番去九龍西市區，有助解決該區現已非常嚴重嘅交通擠塞喎。何解咁講？皆因佢係九西直選出嚟嘅立法會議員囉。