不過，阿Paul處處碰壁下，尋日嘅論壇依然順利舉行，其中一個嘉賓仲係疑似特首候選人、行會召集人梁振英（CY）添，坊間早已盛傳阿Paul埋咗CY堆，唔通係真嘅？阿Paul梗係唔認，解釋一輪，期間又幫CY笠高帽，話今次搵CY做講者，純粹因為對方對呢一方面好有研究，見解亦好精闢。

雖然CY最近不斷就房地產問題發表意見，但香港熟呢個範疇嘅人都唔少噃，阿Paul係咪真係歸咗邊呢？佢重申唔係，仲話至今未有人講明會選特首，自己亦冇取態，希望大家唔好亂咁估。