政壇已為明年嘅區議會選舉做準備，社民連早前放風，到時會派人狙擊民建聯票倉，尋日「飛Bra男」錢偉洛更喺北角港鐵站附近開設流動辦事處，幫手處理街坊投訴，擺明向喺北角錦屏出選嘅蔡素玉（蔡菜子）下戰書。
為咗打響頭炮，飛Bra男帶咗幾十包紙包飲品同兩支大可樂，買埋乳豬請街坊食，仲帶咗十棵菜心嚟切，暗示要砌低蔡菜子。不過，佢哋冇人記得帶把似樣嘅刀嚟，最後惟有搵把餐刀頂檔切菜同乳豬，結果餐刀
菜心，冇晒氣勢，蔡菜子睇到可能都係得啖笑！
搞笑嘅仲有佢哋所謂嘅辦事處，只係一張枱仔、一個易拉架加一個大聲公，每逢星期二、四放工時間喺北角港鐵站附近擺檔，處理吓法團問題；如果希望做法律諮詢，就要先行預約。呢啲流動辦事處隨時可收檔，慳皮又靈活。「維園阿哥」任亮憲都有去撐場，但社民連其他議員就全部失蹤；佢話考慮緊喺將軍澳或沙田出選區議會，下個月可能都會搞個流動辦事處，開始做地區事務喎。