政圈有喜事，立法會議員葉劉淑儀本周二（廿四日）迎來六十歲生日，佢嘅愛女葉榮欣（Cynthia）前晚喺ifc四樓間「The Box」包場，搞咗個盛大自助餐宴會為阿媽賀壽，六十位應邀出席嘅親友中，包括以前喺政府嘅一班舊下屬，好似保安局局長李少光、被視為光哥接班人嘅副局長黎棟國、前入境處副處長周國泉及前助理處長蔡炳麟等，仲要攜眷出席。
傍晚七時許，嘉賓陸續到場，分別有皮膚科醫生史泰祖、前廠商會會長尹德勝、葉太嘅姪仔葉天賜及太太何淑懿、姪女葉天慧等都有現身賀壽。當然仲有葉太幾位愛徒，好似特首辦特別助理陳岳鵬（Ronald）、灣仔區議員黃楚峰等。
Cynthia預訂咗一個重達十磅嘅藍色生日大蛋糕，當晚最精彩嘅節目係嘉賓獻唱，光哥太太獻唱鄧麗君名曲《月亮代表我的心》，本嚟係送畀葉太，點知聽到如癡如醉嘅竟然係光哥，葉太都忍唔住話首歌應該送畀光哥至啱。
一眾舊部屬都現身，唯獨唔見近期地下情曝光嘅廉政專員湯顯明（Timothy），葉太話Tim湯做廉政專員出席議員活動，身份會好尷尬，所以無邀請佢。