巴士工潮失敗冇面

港龍工潮談判尋日凌晨出現戲劇性轉變，勞資雙方一改日前嘅劍拔弩張，和氣收場。勞工及福利局局長張建宗朝早十點零就擒擒青發表聲明，好唔客氣咁掠咗成功斡旋嘅功勞。不過，知情人士就話，職工盟李卓人月中領導四巴工會發動罷駛同工業行動爭取加薪，點知失敗收場，工潮更靜英英冇人騷。所謂前車可鑑，今次佢哋見好就收，唔一味企硬先係主因。又係嘅，阿人如果領導工潮又衰咗，職工盟真係好冇面㗎！

策動今次工潮嘅職工盟轄下港龍航空空勤人員協會十九號舉行會員大會，約一百五十名會員到場，當日阿人都有出席，不過，大會通過月底前採取工業行動時，已經講到明願意隨時同資方磋商。我哋事後都問過阿人，點解今次嘅態度咁柔？又冇擺明車馬話明邊一日罷工？當時阿人就解釋，員工只希望解決困境，唔想影響行業運作，留有空間都係顯示佢哋嘅誠意。

記得巴士工潮嗰陣，工會嘅態度好強硬，阿人今次嘅表述明顯軟化，可能同一個月內第二度搞工潮有關。上次巴士工潮失敗告終，職工盟嘅號召力同牙力都被人質疑，如果第二次工潮又失敗，工會嘅前景真係堪憂。

港龍談判和局算數

結果禮拜五下晝三點，港龍勞資雙方再開會，談判由三點傾到午夜都未完，雖然勞方一度話係僵局，但係雙方願意捱到夜晚十點幾、十一點先叫外賣填肚，目的都係延續個談判，有得傾就代表彼此願意走近，結果佢哋填飽肚之後，又繼續馬拉松談判。

據講，雙方代表期間多次另開小會，向各自高層匯報進展，到咗凌晨四點半，終於握手言和。員工雖然最終爭取到加津貼、要求資方增聘人手等條件，資方亦都維持額外執勤安排等話事權，雙方一人行一步，冇邊個贏晒。何況，在外界睇嚟，和局即係雙贏，大家都冇失威啫。