余若薇早排話，包致金姪女襲警案引發嘅抗議示威去到某一個程度，會變成「對司法機構或者對某一啲司法人員係施壓，其實可能係引致一個藐視法庭罪」。有市民批評佢打壓言論自由，製造白色恐怖，但余若薇繼續死撐，仲話案件加劇咗社會嘅「仇富」氣氛。

叮！真係要多謝余大狀親身示範「拉大旗作虎皮」，一味靠嚇。市民上街抗議司法判決不公，佢就扣上「藐視法庭」嘅帽子，扮晒專家，正一唔知嘅就嚇死，知道嘅就笑死。

嗱，即管睇下正宗嘅專家點講。美國史丹福大學法律系及政治科學系教授高恒（Joshua Cohen）認為，公眾對各級司法判決表達意見，係美國民主傳統嘅一部分，以往從未構成對司法獨立嘅損害或對法律嘅不敬。

哈佛大學司法刑事學院院長蘇利文（Ronald S. Sullivan）教授指出，根據美國憲法第一修正案，只要唔影響法庭運作，冇違反法庭命令，公民有權就法庭判決表達不滿，包括示威及公開批評。亦有英國資深律師表示，根據英國法律，公眾有權對已判案件提出自己意見，唔會構成藐視法庭。

嗱嗱嗱，聽到未？連英美法律權威都異口同聲撐公眾對司法判決表達意見嘅權利。講到美國憲法第一修正案，巴閉咯，呢個法案對美國政治影響巨大，係新聞、出版同言論自由嘅根源，等同「美式民主」嘅護身符。

余若薇平時「民主」、「人權」一套套，仲兩度同本港法律界人士發起遊行，抗議全國人大常委會釋法添。呢次問題涉及司法界，佢就跳出嚟口出惡言，試圖扼殺港人言論自由，一時一副面孔，「民主女神」？收皮罷啦。

「東方報業民意調查」發現，對於余若薇指示威抗議係「藐視法庭」，三成三受訪者認為佢嘅言論唔恰當，三成指有關言論係打壓言論自由，一成七唔滿意佢製造白色恐怖。另外，三成六受訪者質疑余若薇有偏幫法律界人士之嫌，三成四指佢有雙重標準。

民意彰彰明甚，就係唔受余大狀嗰套！毋懼威嚇，不平則鳴，唔係要影響司法獨立，更唔係想藐視法庭，而係要維護司法公正同社會公義。計太一叮話齋，呢啲至係值得每個人驕傲同堅持嘅「香港精神」！