系出名門的Johanna,外公是已故澳門富商高福成,母親是政府前副衞生福利司高雪瑤,父親是網球總會副會長何惠德,她自小出入名人圈,但從來不知甚麼叫明星氣派。直至在英國讀大學時,重遇兒時摯友莫文蔚,才見識星味,「嗰陣覺得明星包裝好誇張好得意,我以為一定可大展拳腳!」終於她真的成為了莫文蔚的御用形象設計師。
成功帶來偏執
溫室小花跌入花花世界,難逃撞板。「當年幫莫文蔚做音樂會造型夾滿晒大髮夾同扣針,電鬈晒頭髮,嗰陣係好前衞!」完騷後卻被主辦機構狂插,「佢哋話你當自己係咩呀!都未出名已經咁搞法!我當時好失望,可以話對娛圈憧憬破滅,原來娛樂圈都咁政治化,要睇好多面色!」
失望之下,Johanna再回英國打天下,終闖出名堂。「Johanna Ho」最高峰期,單在日本便有逾四十間時裝店,事業有成,令她對自我性格企得更硬:「試過做婚姻服務,人哋試得好開心,我都唔會氹人講句『着得好靚呀!』唔想逼自己做唔想做嘅嘢!」今天回想,覺得當年予人印象如何?「唔夠圓滑,好自我中心,甚至可以話自私,得罪好多人都唔定。」說出這話證明偏執的Johanna已不復再。
愛情磨平稜角
脫胎換骨,還是靠終極歸宿—愛情。Johanna提起老公便甜笑:「遇到真愛時會無條件改變,想對方得到最好,慢慢會檢討番,對身邊嘅人又係點呢?」已誕兩女的Johanna對事業還有抱負嗎?「最緊要自己做得開心!」不久,她又想了一想說:「阿媽認同我,就算成功喇!」
Johanna 何志恩小檔案
年 齡:38歲
學 歷:英國中央聖馬丁藝術與設計學院時裝設計學士學位及女裝設計碩士學位
現 職:時裝設計師,曾先後創立I-Limited 及個人品牌「Johanna Ho」
家庭狀況:○五年與中日混血兒丈夫結婚,誕下兩女
品牌分布店舖:連卡佛、Liger Store、Cocktail
星級好友:莫文蔚、徐濠縈、陳奕迅