美食博覽開鑼以嚟日日人山人海，富貴黨前副主席「莎姐」周梁淑怡細女周智琪都擺咗個攤位，售賣自家品牌曲奇。佢話首次喺舖頭以外地方賣曲奇，係睇中博覽會人流夠旺喎，日前佢去會展睇檔，雖然佢係老闆娘，但見到客人上前，都親自推銷。曲奇款式多達十種，首創嘅鐵觀音曲奇、伯爵茶曲奇散發陣陣茶香，啱晒唔鍾意肥膩牛油味嘅人。
智琪喺中環鴨巴甸街開設餅店「Phoebe's Designer Bakery」，售賣特色結婚蛋糕同曲奇。今次走入美食博覽，單係攤檔嘅租金都要三萬幾蚊，佢並非志在賺大錢，而係想藉呢個機會測試普羅大眾嘅口味同反應。開檔幾日，佢話生意唔錯，又透露月底將進駐兩間高級超市，等多啲人品嘗到佢嘅手勢喎！
