各個政黨都吼實下屆立法會五個超級區議會議席，正如白鴿黨副主席「單雞」單仲偕曾經做過葵青區議員，若果喺出年再戰區議會，應該可以攞到超級區議會議席嘅入場券；早前亦傳出可能由黨主席鐵頭仁出選，以便騰出新界西畀單雞，點知佢仲有後着。
單雞早喺○八年立法會選舉就諗住空降港島，不過最後作罷，而佢啱啱又喺西灣河成立咗個地區辦事處，話佢唔係為嚟緊嘅選舉鋪路真係冇人信。佢亦明言白鴿黨喺中西區同南區站穩陣腳，偏偏喺人口最多嘅東區卻只得兩個區議員，故唔排除他朝出山，會空降吉位最多嘅東區喎，咁即係買咗三重保險啦。
另外，「堅定可信民主黨」係白鴿黨用咗多年嘅宣傳口號，但自佢哋支持政改後，口號不時畀網民揶揄，質疑該黨既唔堅定、又唔可信。區議會同立法會選舉臨近，該黨重整旗鼓勢要大翻身，不但開始喺地區插旗，仲有意將新一輪競選宣傳口號定為「講道理．信得過．做到嘢」，以明確黨立場。
「堅定可信」都搣得甩，咪即係確定個黨唔再堅定、唔再可信？不過，單雞再三強調呢個新口號仲未諮詢黨員，未敲定搣甩「堅定可信」唔用。