依家好多遊客喺香港購物都會揀門口貼住「優」字標貼嘅舖頭，貪經過旅遊發展局把關，貨品同服務有番咁上下保證。日前喺銅鑼灣時代廣場見到由「優」字商號組成嘅優質旅遊服務協會（QTSA）一班高層出巡，帶隊嘅QTSA主席李應生話佢哋特登去探訪四間會員機構，了解吓佢哋營商有冇乜嘢困難，以便協會提升服務，咁至可以省靚「優」字招牌嘛！
當日同行嘅仲有多位QTSA執行委員，包括太子珠寶執董朱繼陶、孖人牌代理商昌興行政總裁余壽寧同位元堂執董鄧梅芬等。佢哋首站去時代廣場十一樓嘅聘珍樓，順便用膳，然後去十二樓意大利餐廳Oceanna，跟住轉戰以潮流飾物為主打嘅希臘品牌Folli Folli，尾站係FANCL無添加化妝品。
見佢哋嘅話題集中喺處理客戶投訴方面，尤其依家內地客幾乎佔咗一半客路，點樣多啲了解內地消費者嘅心理愈見重要。一眾老細們細心聽咗成個下晝，李應生話收穫好大，為協會未來提升服務提供咗一個方向。