社民連嘅立法會議員「長毛」梁國雄辭職後又循補選入番立法會，佢嘅大埔辦事處尋日重新開張，唔少嘉賓出席捧場，最特別嘅就要數佢嘅靚靚契女。
長毛六歲大嘅契女眼仔大大勁可愛，形象硬朗嘅長毛喺活動上不時抱住契女玩，除咗笑容充滿溫柔之外，喺佢嘅眼神中仲可以見到乜嘢叫「父愛洋溢」，同平時發火鬧人時完全唔一樣，實在難以相信係同一個人。
長毛透露契女係混血兒，一出世已經同佢上契，平時都有帶佢去唔同活動，好似七一遊行同社民連活動等。長毛仲透露，上禮拜三曾經帶契女入立法會，咁啱撞到立法會主席，契女即時問對方做乜成日趕契爺走，據講主席笑笑口咁答：「因為你契爺唔守秩序囉！」
