兌現期票可分階段落刀

為推銷政改方案，政府開出取消委任區議員呢張期票，依家要兌現承諾。不過，政改方案已通過，過咗海就係神仙，當局自然唔急於將委任議員「一鋪清袋」。眾所周知，依家一百零二個委任議員多屬「隱形」建制派，有平衡民主派勢力嘅實際功能，如果一下子全部消失，深水埗同葵青等民主派佔優嘅區議會就會有失控危機，政府點會搬石頭砸自己腳？

官字兩個口，政府承諾取消委任區議員，但冇指明一次過實現。據聞，政府研究取消委任區議員，已進入最後直路階段，幾近肯定會分兩個或三個階段落刀，所以若果十月立法會開波，當局建議分階段撤銷委任制，就算民主派反枱，主事部門政制及內地事務局局長「林公公」林瑞麟都唔驚畀民主派咬，總之係話之你。反而，對住有後台嘅建制派，林公公唔知牙力有幾大呢？

據悉，建制派某黨近年快速推行年輕化，大班新人排隊等上位，但香港政治出路狹窄，立法會直選只加五席，政治任命中資歷要求較淺嘅政治助理又隨時玩埋今屆就冇，如果連委任區議員制度都冇埋，新人輪替嘅隊伍就會塞死晒，急須排洪。

四百小區 隨時重新劃界

所以，當局就取消委任區議員同政黨私下「摸底」講數期間，該黨極力要求政府取消幾多委任議席，就要增加相同或者某個比例數目嘅直選議席，好讓政治新丁有落場練兵嘅機會。

不過，呢個建議牽一髮動全身，當局分分鐘要為十八區共四百個小區重新劃界，而且，民選議員增加後，人多聲雜，當局更難應付，多勞少得，林公公梗係唔想做啦！但係該建制派政黨喺立法會有唔少票，若果政府唔就範，政改方案本地立法可能有阻滯，咁就得不償失嘞！

政府當然唔想得失建制派，但人哋好似大白鯊咁勢兇夾狼，聽聞林公公依家相當頭痛，睇怕講數講到牙血都出埋。