政府舊年係威係勢咁推出一個樓宇更新大行動計劃，合共斥資十幾億元資助舊樓維修工程，包括維修樓宇外牆、更換窗戶、維修水渠、更新消防設備等等。當局吹水唔抹嘴，話計劃嘅特色係「規模大、效益快」咁話。

計劃規模的而且確係幾大嘅，據講至上月為止，已經批出咗六百幾棟大廈嘅翻新工程。不過，講到效益咯喎，就失禮死人嘞。唔講唔知，一講嚇你一驚，好多工程都搞到唔湯唔水，有啲仲分分鐘爛尾。

因乜事會咁大鑊呀？事關參加更新計劃嘅大廈，好多都畀人起咗僭建物，令維修工程受阻。好似旺角嘅宏華大廈同荔塘大廈，維修津貼一早就批出，但遲遲未開工。本報記者去現場巡視，發現其中嘅奧秘，原來大廈嘅平台起咗好多間鐵皮屋，有啲仲裝埋冷氣機添，連污水渠都被壓住，點維修呀。

咁屋宇署點解唔做嘢呀？署方話喎，○七年已經接到荔塘大廈有僭建物嘅投訴，因為冇即時危險，唔可以即時取締，只可以送交土地註冊處釘契。至於宏華大廈嘅僭建物雖然屬於可取締類別，已經發咗清拆令，但係業主冇遵從，仲加建新僭建物，署方惟有繼續檢控行動咁話。

叮！勢估唔到，堂堂屋宇署居然連幾間僭建物都搞唔掂。更離譜嘅係，署方仲實牙實齒話，呢啲僭建物並冇影響大廈嘅維修工程。人哋急到紮紮跳，佢哋仲講風涼話，啲業主有乜法子唔媽媽聲呀。

其實受害嘅唔單止呢兩間大廈，亦唔止旺角區，全港各區都有好多大廈維修工程因為有僭建物而受阻。香港業主會就曾經向屋宇署轉介咗十幾單相關投訴，但係屋宇署一於當冇其事。咁就玩死大廈業主立案法團喇，因為佢哋同承建商簽嘅工程合約，為期只有一兩年，搞咗年幾都拆唔到僭建物，剩番咁少時間，點更新成棟大廈呀？難怪有區議員警告，屋宇署咁樣做，隨時會引發法律訴訟潮。

仲有呀，有啲承建商趁機偷工減料，求其髹吓牆就算，鋼筋鞏固、渠務工程等重要工序反而冇做。咁搞法，死人冧樓悲劇遲早重演。

俗語話，冇嘢急得過死人冧樓，但係屋宇署呢班官僚居然連死人冧樓都唔當回事。一個好好地嘅樓宇更新計劃，畀佢哋搞到爛尾咁滯，問你服未？如果住危樓嘅係佢哋嘅親人，睇吓佢哋仲敢唔敢唔嗲唔吊吖嗱？叮佢個鎯鎯！