全國青年聯會係唔少名人之後踏足內地政壇嘅跳板，今個月二十四號起，全國青聯會喺北京人民大會堂開會，換屆人選都會屆時敲定，港區青聯向來有兩個全國青聯副主席位，經過一番龍爭虎鬥，據講已經塵埃落定，一個位鐵定由香港青聯主席陳仲尼擔任，另一個位則好大機會落入香港青聯副主席、新世界發展執行董事鄭志剛手中。
消息透露，呢個月二十三號，第十一屆全國青聯會議先舉行預備會，二十四日就喺人民大會堂舉行大會開幕儀式，屆時九名中央政治局常委都會出席，二十五日參觀交流，二十六日選出新一屆常委、副主席同主席。
鄭志剛上位，可能同中央睇重其家族背景有關。鄭家喺內地有龐大投資，仲捐咗唔少錢，最近就捐咗三千萬元畀澳門大學發展基金會。據聞，鄭家亦承諾分五年捐款五千萬，支持內地青年工作，第一期捐款已經到位。
競爭激烈，早前一度傳出陳仲尼可能脫腳嘅消息，據講一眾香港青聯元老如霍震寰、黃英豪、曾智雄等紛向中央表態，指香港青聯係全國青聯對口單位，結果落實陳仲尼做副主席一職。至於有機會進身常委嘅就包括霍家長孫霍啟剛、觀瀾湖球會主席朱樹豪大仔朱鼎健、莊士集團主席大仔莊家彬、信置主席黃志祥大仔黃永光，以及同新金王黃英豪攜手開拓網上商務平台嘅吳傑莊等。