廣東社團總會主席兼全國政協委員王國強（KK）係建築企業「金城營造」嘅老闆，同時亦係飲食業中人，佐敦柯士甸道童軍中心嘅會所式酒家「金陶軒」就係佢嘅傑作。
KK早幾年捱義氣斥資開金陶軒，但開業初期好似燒銀紙咁，曾經蝕幾百萬元，一度想放棄，佢話：「我把心一橫，將酒家轉型走中高檔路線，深信只要菜式有水準，實有得做！」
自此，佢不時坐鎮金陶軒突擊試菜，食到唔合水準嘅菜式，就二話不說打回頭。舊年金陶軒嘅「糖醋子薑骨」奪得「美食之最」豬肉組冠軍，呢味餸以豬肋骨配鎮江醋同秘製醬料烹調，外皮香脆，肉汁豐富。另一味「麗影紅紗卷」，亦喺○四年勇奪「美食之最」牛肉組冠軍，以越南紙糯米包肥牛炸至金黃色，入口脆卜卜，嗒真啲又帶啲煙韌，淋上牛肉碎粒製成嘅酸甜醬汁，大有畫龍點睛之效。