唔好嚇親，事實係長毛一把長髮原來商機無限，正確啲講，應該係長毛呢個形象都有好多商機，佢尋日出席電台節目時透露，三、四年前有廣告商曾經同佢接洽，想搵佢拍一個外國牌子洗頭水廣告，不過只係好初步接觸階段，最終不了了之，如果唔係，大家可能喺電視上睇到長毛輕撫秀髮嘅樣。

除咗洗頭水廣告，原來早幾年仲有人搵過佢拍纖體同整容廣告，出手一啲都唔低，開到成百萬咁多㗎。佢話最初都打算接拍呢啲廣告，諗住再將啲錢捐畀當時成立無耐、經費捉襟見肘嘅社民連，最後因為社民連嘅經濟政策綱領上講明唔鼓勵人去纖體，加上一眾黨友反對，最終都係推咗。佢跟住又話，相信愈嚟愈少人會搵佢拍廣告，一來佢拍嘅廣告入唔到內地市場，二來好多人覺得佢唔代表大多數香港人喎。

講起頭髮，一把長髮嘅長毛應該有唔少護髮心得，但佢話平日洗頭最快三分鐘搞掂，最慢都係五分鐘，得閒先會用護髮素，所以唔講得上有乜心得。佢仲再次重申，留長頭髮純粹自己鍾意，同政治無關；仲話有朝一日覺得麻煩嘅話，會毫不猶豫剪咗佢喎。