廣播事務管理局前日以違規播放政治廣告為由，裁定商業電台兩個節目違規，要罰款以示懲戒。不過，廣管局嘅裁決就引嚟唔少批評，其中一個係話政府「只許州官放火，不許百姓點燈」，事關政府五、六月期間大玩「起錨」攻勢，電視、電台密集式轟炸，話之市民嘅感覺，家吓話人哋違規，真係官字兩個口。
有「人肉錄音機」外號嘅政制及內地事務局局長林瑞麟尋日出席一個公開場合時，首次回應事件，佢話政府一直恪守唔鼓勵政黨透過電子媒體進行政治宣傳嘅原則，又堅稱「起錨」電視短片同電台聲帶，唔係政治廣告。咁係乜呢？佢話嗰啲係介紹公共政策，並非選舉廣告或政黨推廣工作。
佢嘅解釋難逃雙重標準嘅質疑，而且公共政策同政治嘅距離有幾遠？真係要問吓佢喇。不過，睇怕林公公以後只會好似開着錄音機咁，一而再、再而三咁重複呢個答案，唔會有新意。