呢排城中興用單鏡反光相機，尋日第二屆香港國際茶展閉幕，福建幫頭領、全國政協常委兼中國茶文化國際交流協會會長楊孫西巡場時，都好專業咁揸住部單鏡反光相機左影右影。問佢點解要咁親力親為，佢話，影低茶展發生嘅大事小事，順便諮詢吓參展商意見，啲資料仲會拎返去記錄存檔，等下年再搞好啲，所以話，認真先係成功之道。
今屆茶展有超過三百個參展商，楊孫西話今年生意大致比往年好，唔少參展商都好滿意依家嘅安排，但有部分就希望三日嘅茶展，可以開放多一日畀公眾參觀。
十幾歲起開始品茶嘅楊孫西仲話，安徽鐵觀音係最靚嘅鐵觀音，製茶時用竹籬裝住茶葉，人手篩吓篩吓咁慢慢等佢發酵，過程中茶葉嘅邊皮會變乾，轉為紅色；即使製成沖泡後，茶葉都會保持紅色邊緣，所以又名「綠葉紅邊」。佢尋日喺場中仲撞到啱啱為「國際金茶王」頒完獎嘅商務及經濟發展局局長劉吳惠蘭，兩個人仲即場歎咗杯茶添。