出年有區議會選舉，後年又輪到立法會選舉，白鴿黨要搬竇都要趕喺今年下半年同出年上半年搞掂至得。據講，放咗太子個單位，估計可以為佢哋套現六百萬至七百萬元左右，但係買番個新竇，加埋新竇嘅裝修費，睇怕仲要補成五百萬元。

白鴿黨嘅舊巢好細，早已唔夠用，近年富貴黨、公文袋都相繼搬去工廠大廈，白鴿黨或者都係打呢個主意，只係人哋早着先機，佢哋就等到樓市㷫合合先做，依家風險指數咁高，鐵頭仁佢哋偏向虎山行，容乜易損手做樓蟹㗎？

加碼派人選區會

講到白鴿黨忽然富貴仲有一例，佢哋本來計劃出年區議會選舉實行精兵制，只派百零人出選，後尾加到一百二十幾人，最近政改效應蒸發，佢哋決定再派多二十幾三十人參選，即係可能超過一百五十人。漁翁撒網參選，選舉開支肯定比原本多三分之一都唔止，唔通忽然有大水喉射住？

白鴿黨忽然心雄，既要住大屋、又要「擴軍」，惟有勤力撲水啦。今年十六周年黨慶，佢哋一改以往喺平民化大酒樓搞嘅慣例，升呢去尖沙咀The ONE，據佢哋話，投資大啲、回報都會高啲喎。白鴿黨忽然由儉入奢，會唔會係變質嘅開始呢？