搵食緊要，身體更緊要，戶外活動千祈要留意氣溫。好多人事前會上天文台網站了解氣溫資料，但如果信晒天文台，分分鐘中咗招都唔知，天文台話天氣清涼，實情可能係熱到中暑。

嗱，天文台掛錯風球已經唔算新聞，估唔到氣溫數字一樣牙煙。本報記者日前去多區親身量度後發現，部分地區氣溫比天文台網站數字高咗一大橛。以荃灣街市街為例，記者支溫度計量到三十五點一度，但天文台網站顯示荃灣區得廿九度，差六度有多。其他地區氣溫數字閒閒地差三、四度，市民唔做足防護措施，隨時領嘢。你話天文台係咪生蟲拐杖，靠唔住吖！

點解相差咁遠？原來天文台嘅自助氣象站唔喺高處就喺深谷，都係山旮旯地方。呢，荃灣嗰個就設喺百幾米高嘅大帽山山腰，風涼水冷，開揚通爽，同樓高路窄、人多車密嘅鬧市根本係兩個世界，氣溫數字唔差天共地至奇啦。

天文台解釋話，自己啲儀器好鬼先進㗎，氣溫準確度「不容置疑」，仲強調氣象站選址完全根據世界氣象組織建議去做。高科技加「洋標準」，邊個夠膽質疑？

叮！冇人話啲儀器落後，弊在量度位置搞錯咗。有乜理由將氣象站裝到冇雷公咁遠㗎？香港嘅環境同其他地方好唔一樣，人口集中而且建築物非常稠密，係影響溫度變化最大因素之一。盲目按外國嗰套選址，唔止墨守成規，愚不可及，更等於將公帑揼落鹹水海，咁樣嘅自助氣象站不設也罷。

有環保組織人士批評自助氣象站選址冇以人為本，數據冇參考價值。為保護戶外工作人士嘅健康，當局應喺市區繁忙地點監測氣溫。其實，準確嘅氣溫數據固然重要，公布暑熱指數，喺酷熱天氣下對戶外工作人士作出特殊安排，當局同樣要考慮。

內地早就制訂咗高溫天氣開工嘅相關保護措施，而暑熱指數好多國家都實施緊，唯獨港府淨係識用量氣溫呃秤呢招幫市民「消暑」，慳水慳力，真係要寫個服字咯。

查實，監測數字呃秤，港府早就做慣做熟。呢，科技大學舊年試過用自製儀器測量空氣污染，同樣發現所得結果遠遠高過環保署路邊監測站錄得嘅數字。原來環保署監測點離地五米咁高，點監控行人面對嘅污染物情況呀？

計太一叮話齋，監測空氣「高高在上」，量度氣溫「遙遙相望」，港府施政質素離市民要求愈來愈遠，唔怪得港人嘅生活質素指數跌到阿媽都唔認得啦。叮！