匯賢智庫嘅立法會議員葉劉淑儀愛女榮欣由美國返港放暑假，兩母女早前就去咗米芝蓮三星級著名食府龍景軒撐枱腳。葉劉同榮欣此行仲有另一目的，就係探老友嘞。
原來葉劉嘅facebook粉絲Bernard Chan月前由半島酒店嘅瑞士餐廳跳槽去咗龍景軒做品酒師，葉劉一於嚟打氣。Bernard為葉劉預備一支甘香清甜嘅白酒，又精選幾味巧手菜式，包括甜豉醬焗智利鱸魚柳、豉椒龍蝦球等，鱸魚柳焗得香脆，魚味濃郁，配上甜豉醬，吊出鮮魚香味，葉劉愛keep fit，食魚最啱佢。
之後再嚟一味澳洲和牛面肉。澳洲和牛係以日本傳統養牛方法，喺當地牧場飼養嘅日本牛種，所以油花分布絕不遜於日本和牛。龍景軒以古法炮製和牛面肉，牛面肉入口似牛腩，不過肌理比牛腩幼細嫩滑。