喺書海前，David雙眼不停掃射心水書籍，睇見最愛嘅歷史書，佢兩眼即時放光，三扒兩撥掃入幾本講述中國歷史、英國歷史同中國猶太人嘅英文書，每本書有成吋幾厚，佢攞唔晒，於是將揀啱嘅書先放喺收銀處。店員對呢位貴客照顧周到，只要David一揚手，店員就好醒目咁伸出雙手接住啲書。

店內同時出售多幅攝影名作，每幅大到足以掛喺大廳牆壁，佢左睇右睇，似乎對邱良嘅作品非常着迷。邱大師擅長透過鏡頭捕捉香港風貌，其中兩幅展示上世紀六、七十年代香江風貌嘅作品別具韻味，佢愈睇愈鍾意，一於扑錘買走，笑瞇瞇咁捧住兩張相行去收銀處碌卡畀錢。

David行出門口時，記者上前打招呼，佢笑住咁話：「買咗七本書咁多，部分用嚟睇，部分會收藏起嚟。」佢又自爆生活寫意，啱啱同太太把臂同遊法國歎世界喎。