鄉議局新大樓尋日舉行上樑典禮，主席劉皇發、副主席張學明率領一眾鄉紳同嘉賓參加，新大樓明年初將會落成啟用。新大樓條樑就上得夠晒正嘞，但「下樑」似乎唔係好正噃，事關上樑咁大件事，副主席「We Wet強」林偉強竟然唔見影。

逾百名嘉賓出席上樑典禮，當中包括多名司局長同馬會主席陳祖澤等，由於新大樓地盤未有冷氣，簡直焗桑拿咁，而且全部人都要戴埋安全帽，搞到連頭頂都出晒汗，要騰出騰入招呼賓客嘅發叔就更加辛苦嘞。

喺鄉局地位不保

發叔走到身水身汗，但We Wet強竟然冇尾飛陀，到底去咗邊？發叔好無奈咁話：「佢去咗服侍班離島區議員去遊上海世博嘛，嗰度（離島區議會）多票吖嘛，我哋鄉議局和諧就話唔會踢佢走啫！」嘩！聽完呢番話就知發叔有幾嬲，同時似乎暗示We Wet強因為「地位」不保，所以輕視鄉議局呢次活動。

老實講，發叔仆心仆命，都係為咗新大樓啫，尤其係新大樓要成一億五千萬元建造費，撲水撲咗咁耐，聽聞依家仲差二千萬至三千萬元先埋到尾，而上樑典禮後，新大樓好快就啟用，仲有好多嘢要做，總要有人分擔吓㗎，但有人就唔當係一回事，又唔上心，發叔當然㷫到爆啦！

之不過，可能知道講到過咗火位，發叔啖氣過咗之後就補番飛，話We Wet強個生肖同尋日上樑個良辰吉日相沖，所以要迴避典禮喎！

翻查資料，We Wet強係一九四九年出生，生肖屬牛。我哋問過堪輿學家麥玲玲，佢話尋日係定日，宜上樑同修灶，而相沖嘅生肖只有蛇，同屬牛完全冇相沖，咁究竟要迴避啲乜呢？睇怕得We Wet強自己至知嘞。