八達通出售二百萬客戶資料牟利醜聞被踢爆，公司行政總裁陳碧鏵短短幾日內，由死口唔認到醜聞愈爆愈多，誠信早已破產。「大話精」係知衰自己執包袱，定係畀人叮走，個個都想知答案。

謎底尋日終於揭盅，八達通董事會宣布接受陳碧鏵請辭，並將轉售客戶資料所得嘅四千四百萬同點算緊嘅相關盈利捐畀公益金，仲承諾會刪除已經提供畀生意拍檔嘅客戶個人資料。奇怪嘅係，陳碧鏵並唔係即時消失，而係留到明年二月合約完咗至離開。

叮！攞客戶資料當貨賣衰咗，仲可以多半年人工，簡直離晒譜。更激氣嘅係，港鐵宣布有關消息嗰陣，冇批評陳碧鏵講大話，仲讚佢為八達通「貢獻良多」，有冇搞錯？市民多得佢唔少就真！

不過最離譜都係呢個扮嘢政府。市民畀人賣咗豬仔，當局烏吓烏吓，反應遲鈍，賊過興兵不特止，仲一味推卸責任。財經事務及庫務局局長陳家強尋日要求八達通就公司管治、事件善後等方面交代，係威係勢扮晒正氣凜然。當被問到政府身為港鐵最大股東，而港鐵又係八達通最大股東，係咪要為呢次事件負責，佢冇正面回應。原來「傻強」一啲都唔傻，聞到鑊氣，即扮無辜，面皮成尺厚。

私隱有價保障少，政府無牙漏洞多。查實，呢次私隱大災難政府應該負上最大責任。客戶私隱長期被侵犯，受影響市民數以百萬計，監管完全失職，唔通一句「不知情」就可以過骨？

叮！再講吖，保障私隱嘅法例甩漏處處，私隱公署早已係無牙老虎，當局從未諗過堵塞漏洞，卒之愈漏愈大鑊，二百萬市民中招，而且以類似手法圖利嘅企業唔止八達通一家。私隱賣通街，唔通政府一啲責任都冇？

唉，呢個政府卸膊一流，政治智慧就九流。嗱，八達通事件搞到滿城風雨，市民私隱不保，十足畀人剝晒光豬咁。關鍵時刻，前私隱專員吳斌夠鐘離任，當局居然搵個對保護私隱毫無經驗、侵犯私隱有前科嘅前高官繼任。新科私隱專員蔣任宏尋日履新，第一件事就係為當年任職郵政署署長期間，長沙灣郵局安裝針孔攝錄機，被指侵犯員工私隱嘅事件解畫，話自己事先並唔知情。未談大計先「洗底」，市民點放心吖？

港府港鐵齊卸責，八達通高層做錯事唔使罰，私隱專員根本唔夠班，計太一叮話齋，市民如果唔想再畀人賣豬仔，惟有打醒十二分精神，自求多福咯。