搖身變成食評家嘅前高官Stephen葉澍堃發現，尖沙咀高級日本料理八重菊主打嘅九州佐賀A5級牛肉肉質鬆化，矜貴程度比拖羅更甚，連少食牛肉嘅佢都話口感極滿足。
舊年底喺iSquare開業嘅八重菊，幕後其中一位老闆就係「阿一鮑魚」老闆楊貫一，呢日佢哋相約去八重菊試菜。阿一精選刺身拼盤，選用北海道八吋長特大牡丹蝦、肥美拖羅同深海池魚腩等，拼砌成藝術品一樣上枱。Stephen見到魚生柔亮有光澤，一派食家口脗咁話：「嗯，啲魚生真係好新鮮。」
成餐飯重頭戲係八重菊人氣之選嘅佐賀A5級牛肉。佐賀和牛食有機飼料，肉質嫩滑無比，牛味特濃，入口即溶。佐賀A5級牛肉身價矜貴，每二百克賣一千七百蚊。
八重菊背後仲有一位大老闆，就係家族有份投資富豪飯堂富臨飯店嘅飲食界巨子陳志豪，佢近年由英國學成返港，協助打理八重菊。問佢有乜營商心得，佢不忘搬出恩師教誨：「一哥教落，乜都係假，食材新鮮最緊要！」