由匯賢智庫立法會議員葉劉淑儀夫家家族持有嘅飛鵝山道大宅近日推出標售，曾經喺大宅住咗十八年嘅葉劉前日特登舊地重遊，影相留念，佢話呢座大宅空氣好、風水好，囡囡榮欣都住得非常開心。
葉劉尋日喺facebook上載咗佢重遊舊居嘅相，仲留言話佢八一年開始住喺大宅，一住就住到九九年，雖然當時有蛇蟲鼠蟻、制水同水浸、竊匪同偷渡客、山泥傾瀉同山火等，但嗰度係佢十幾年嚟照顧丈夫同養育囡囡嘅地方，所以意義重大。個大宅間屋一萬呎，花園五萬呎，當年就只得佢哋幾個人住。
大宅喺下個月十六日就截標，市場人士估呢個項目值四億元，果然係風生水起嘅好地方。