台灣訪問團一嚟可以表現C18嘅團結，二嚟適逢十一月係台灣五個直轄市（五都）嘅市長選舉，依家藍、綠陣營嘅競選活動正進行得如火如荼，大輝去睇佢哋點搞選舉，啱晒時機，返到香港仲可以即刻用番喺區會選舉度，分分鐘對之後嘅立法會、選委會同特首選舉有幫助添！大輝本身嚟自功能界別，去台灣睇地方選舉，可謂別具意義。

據我哋所知，訪問團嘅行程非常緊密，今個月二十號飛高雄，參觀市會議廳後，就即刻搭高鐵上台北，約見唔同嘅地區團體同非政府機構，仲會直接同市長選舉候選人交流意見。大輝睇中嘅全部係台灣頂級人馬，分別會見喺新北市參選嘅國民黨副主席朱立倫、民進黨主席蔡英文、台北市現任市長郝龍斌、民進黨「四大天王」之一蘇貞昌，以及大高雄市嘅陳菊同黃昭順等。

要見咁多猛人，聽聞大輝已下令，二十五個參加嘅團友都要做足功課先可以起行，起碼要了解咗台灣市長選舉嘅基本狀況，唔可以到時去到失禮人喎！