由政府宣布委任蔣任宏後，反對聲音不絕，前排先有香港郵政局員工會嘅代表遊行，要求蔣任宏自動請辭。高級公務員退休後轉職搵真銀唔係新事，但竟然有員工走出嚟抗議舊老闆轉工，都咪話唔好笑。佢哋反應咁大，皆因幾年前東方報業集團踢爆有失竊事件發生嘅長沙灣郵政局偷偷哋安裝針孔攝錄機，最後畀私隱署裁定侵犯私隱。

為咗擺脫呢個污名，蔣任宏尋日喺記招再次發聲明劃清界線，指唔係佢批准裝針孔攝錄機，事後已經採取措施補救，但始終甩唔到身，當記者問佢點睇工會嘅抗議、會唔會覺得尷尬時，佢即刻口啞啞，仲九唔搭八咁話冇人可以做到一百分，又話好享受同郵政署同僚並肩作戰。咁講更加係此地無銀啦！

跟住佢仲引用番以前喺郵政署做嘅「職員觀感調查」嚟遮醜，話每次結果都顯示有八成人覺得「士氣高昂」。之但係士氣高昂同尷唔尷尬有乜關係呢？記者多番追問，佢都係好似「食帶」咁話唔可以令到所有職員都士氣高昂，簡直係廢話。

被平叔炮轟冇立場

以為佢衰咗一次會識得執生啦，點知尋晚佢喺電台節目評論八達通事件時又畀人鬧。主持節目嘅係有「庸官殺手」之稱嘅前問責高官王永平，平叔問佢八達通行政總裁陳碧鏵辭職係咪足夠向公眾交代？董事會使唔使負責？點知蔣任宏即時耍官腔，話公司管治問題要交畀其他人處理。

平叔聽到火都嚟埋，大鬧明明係一件關於私隱嘅事，點解私隱專員可以冇立場，係咪專員呢個位係「廢廢哋」？蔣任宏畀人兇完都唔識死，繼續講廢話避問題，真係唔得你死！其實佢朝早先用職員觀感調查做遮醜布，夜晚就即刻畀人篤爆，即係話點遮都冇用！