食物及衞生局局長周一嶽話喎，蘇利民辭職係醫管局一大損失，仲猛讚佢貢獻良多，加強咗同醫護人員溝通，大力改善公立醫院資源分配，又提高咗醫療事故嘅透明度咁話。對一個即將離任嘅人講幾句客氣話，本來無可厚非，問題係周一嶽講得咁假，簡直令人想嘔。蘇利民真係貢獻良多？正如病人組織話齋，佢根本冇乜建樹。嗱，呢啲先至係真話喇！

俗語話，外來和尚好唸經，其實未必。蘇利民呢位外來和尚嚟香港四年幾，就冇唸到乜嘢好經，佢上任時係威係勢提出一大堆改革承諾，仲話要為醫管局瘦身、滅赤，點知到頭來乜都做唔到。所謂瘦身，唯一令人有印象嘅係向醫管局幾十個高層主管派肥雞餐，卒之咪又係唔湯唔水，不了了之。至於滅赤咯喎，政府年年增撥資源，都唔夠為醫管局填氹，何來滅赤吖。

更弊嘅係，錢使咗，亂象一啲都冇改善。醫管局高層人浮於事，前線就人手奇缺，醫護人員工時長嘅問題始終未解決，卒之搞到醫護大逃亡。叮，連醫生超時補水都要搞到對簿公堂，你話醫管局係咪七國咁亂吖。

講到亂，公立醫院醫療事故無日無之，推陳出新，更加令人嘆為觀止。今時今日，輸錯血、打錯針、開錯刀已係小兒科，見死不救、滾水淥B、唔見嬰屍等醜聞先至係見所未見，聞所未聞。難為周一嶽同蘇利民仲異口同聲話呢幾年醫療事故已經減少咗，真係吹水唔抹嘴。

蘇利民主理醫管局四年幾，貢獻就睇唔到啦，令人印象最深刻嘅係佢曾經聲稱，公立醫院經常被揭露醫療事故，背後有政治意圖咁話。正所謂寧犯天條，莫犯眾憎，蘇利民九唔搭八，開口夾着脷，有乜法子唔引起眾怒吖，結果咪又係要死死氣道歉！

不過講番轉頭，如果將醫管局嘅亂象統統歸咎於蘇利民一個人，又唔係幾公平嘅，事關醫管局內部問題多多，積重難返，正如一個病入膏肓嘅病人，就算華佗再世，都救唔番啦。平心而論，蘇利民初時都有一番雄心壯志，想大展拳腳，可惜一跌入醫管局呢個大染缸，根本無所施其技，搞到意興闌珊。

話時話，蘇利民走後，邊個嚟收拾呢個爛攤子？醫管局行政總裁年薪四百幾萬，唔怕搵唔到人接替，問題係，如果醫管局唔進行徹底改革，無論邊個做行政總裁，結果都一樣。正如一棵樹根已經腐爛、樹身已經蛀蝕嘅大樹，任你點修剪枝葉，最終都會冧。叮佢個鎯鎯！