匯賢智庫嘅立法會議員葉劉淑儀尋日應邀出席香港書展嘅講座，葉劉仲即場拋書包大晒歷史知識，話自己由細到大都好喜歡睇文學巨著，當中尤其喜歡《史記》中嘅《李將軍列傳》，因為主人翁李廣好似佢喎。
李廣原來係漢武帝時期大名鼎鼎嘅將軍，性格勇猛剽悍，但本身運氣奇差，其後打敗仗不受重用，最後仲因為畀皇帝譴責憤而自殺添。咦，葉劉特別用呢個歷史人物自比，唔通係暗示當年身為高官嘅自己同樣官途多舛、運氣欠佳，最後仲喺「二十三條」一役為咗保住政府而辭職呢件事？
葉劉仲提到八十年代喺名校史丹福大學讀工商管理碩士時，曾經將指導教授嘅理論同埋李廣呢個人物融入論文，結果仲得到甲級成績添！
