24/07/2010

播放本新聞相關短片

政情:李慧琼返科大做校董

尋日憲報公布委任嘅立法會議員Starry李慧琼做科大校董,下月一號起生效,原來佢不但係科大舊生,仲係歷來首位由科大畢業嘅立法會議員。

對於可以重返母校做校董,Starry非常興奮,自言對母校好有感情,依家不時都會揸車重返校園緬懷吓。讀會計畢業嘅佢又記得,當年成立冇耐嘅科大為咗催谷啲學生,比其他老牌大學更着重考試,一年幾乎由頭考到尾,連兼修嘅歷史科一樣要考,諗番轉頭真係覺得幾辛苦。唔知佢做咗校董之後,會否為班師弟師姐着想,建議校方減少啲考試呢?

同Starry同期進身立法會嘅黨友陳克勤,年前亦喺建制派力撐下當選中大校董,重返母校服務,但就因為英文唔好爆出「try our breast」笑話,以及係透過黨派交易而當選,遭部分中大學生猛烈批評。不過今次Starry係由科大校董會推薦嘅,唔涉及黨派利益,加上佢英文咁好,相信唔會出問題。