Mandy大爆○五年政改嘅內幕，話當年煲呔曾喺表決前約六名有機會「轉軚」支持政改嘅泛民議員密會撬票嘅經過，話當日下晝已知邊六個人會上禮賓府，佢唔知點處理，成個立法會入面淨係覺得卿姐信得過，所以就故意漏料畀卿姐。卿姐即刻打畀有份見煲呔曾嘅街工梁耀忠，力勸佢唔好去禮賓府，最終成功令煲呔曾撬票失敗。

Mandy話自此覺得卿姐係民主女神，點知今年到卿姐轉軚，勁數卿姐已經變晒質，令佢覺得當年應該支持政改咁話！卿姐聽到當然扯火，差啲拍枱走人，但就冇否認有搵過阿忠。

換言之，Mandy其後自爆當年口疏放料畀卿姐，泛民先可以否決政改啫！其實，唔單止咁，早前白鴿黨立法會議員甘乃威怒炒女助理單嘢，佢咪一樣係周圍講，可見佢十足十兄弟裏面嗰個「大口九」，夠大口。

其實，尋日嘅節目仲有個嘉賓，就係堅決反對方案參加「五區公投」、之後仲自爆做過舞小姐嘅前學聯秘書長周澄。不過周澄以傷風為由，足足遲咗五十分鐘，最後講咗幾句就草草了事，同冇去完全冇分別。