24/07/2010

播放本新聞相關短片

政情:田少林健鋒再見亦兄弟?

喺○八年立法會選舉連任失敗嘅田北俊辭咗富貴黨主席一職,跟住富貴黨「家變」,林健鋒孖住兩個親密黨友退黨再另起爐灶,不和傳聞亦不絕於耳,尋日佢哋再碰頭,咁再見仲係咪「兄弟」呢?

尋日由香港龍舟協會主辦嘅「香港龍舟嘉年華」舉行揭幕禮,田少做主席嘅旅發局有份合辦,所以同贊助今次活動嘅盛事基金評審委員會主席林健鋒同場出現,佢哋有講有笑,田少見太陽曬,即刻拉埋林健鋒一齊企過去騎樓底避陽光。之後佢哋行過去岸邊,同金至尊主席黃英豪同副董事徐傳順,一齊幫多艘金至尊贊助建造嘅全新龍船進行傳統醒龍儀式。

唔知係咪啱啱打完風,海面漂滿垃圾,向來細心嘅田少竟然對住林健鋒衝口而出話:「啲水咁污糟,跌落水浸死你!」吓!唔通田少憎林健鋒憎到咁?但熱到㷫過辣雞嘅林健鋒對田少呢句話冇乜反應,亦冇搭嘴喎。不過講得出咁嘅說話,證明佢哋嘅交情都去到百無禁忌地步囉。