24/07/2010

播放本新聞相關短片

政情:特首辦玩fb隨時洗板

喺高鐵事件後,外界狂轟政府諮詢方式老舊,同習慣用各種網上渠道溝通嘅「80後」年輕人脫節。據悉踏入八月,由Raymond譚志源揸弗嘅特首辦,將會成立一個官方facebook(fb)帳戶,而履新兩個月即被封為特首辦「新媒體主管」嘅特別助理陳岳鵬則負責具體製作。消息話,以後政府會借用呢個平台,就各項政府政策同社會熱門議題,拉近同年輕人嘅距離。

據聞除有特首辦官員撰文分享生活點滴呢啲例牌菜外,仲會有特首辦一班核心嘅個人介紹,又有工作實況嘅掠影希望搞到有外國劇集《白宮群英》feel。之不過,《白宮群英》裏面班總統幕僚角色,個個都係精英中嘅精英,同現實世界嘅特首辦差距有幾大,公眾自有評價,特首辦fb小心一開留言板就被人洗板喎!

Raymond譚呢個大想頭最終能否如願,暫時未知,但可以肯定嘅係喺高鐵撥款一役後,政府咁遲先做呢個補鑊動作,可以話係後知後覺。

其實,外地政府早就借互聯網加強同市民溝通,美國白宮係表表者,馬來西亞首相斯里納吉更加習慣用fb與Twitter同民眾溝通,年初佢就喺Twitter透露煲呔曾到訪同佢作非官式會面,無意中踢爆煲呔曾放假去馬國。特首辦開fb已慢人幾步,若果搞到一鑊粥就真係瘀爆嘞!