環境局尋日終於公布落區行程安排，下個星期一由中午一點鐘至下午五時十分，依次到中環港澳碼頭巴士總站、銅鑼灣駱克道近景隆街小巴站、紅磡港鐵站外的士站、旺角花園街及通菜街的士站同埋藍田公共交通交匯處實地考察。其中首站港澳碼頭由於邱騰華事先有約，會由環保署代表頂住先，之後四站就由局長親身上陣，仲講明會進入小巴同的士車廂，不過就冇交代到邱騰華會唔會親身上車體驗下焗桑拿嘅滋味，又或者會「焗」幾耐。

十多封電郵炸立會

停車熄匙爭議仲有排拗，環境局又惹來另一個火頭，就係引起全港保育人士關注嘅大浪西灣工程。單嘢曝光唔夠幾日，立法會秘書處已收到十多封電郵投訴，矛頭直指邱騰華，當然包括咗九個環保團體嘅聯署信，其中一封就狠批佢淨係識得叫啲小市民停車熄匙，對於涉及有錢人嘅大浪西灣事件就冇晒符。另一封仲直指喺大浪西灣工程，邱騰華係有絕對嘅責任，要佢即時搞番好，否則佢就係失職，亦唔配再做局長呢個位。仲有另一封更借政府嘅政改起錨口號，促請邱騰華act now！即係立即做嘢咁解。

邱騰華都係揸車嘅，但佢先喺停車熄匙問題上，辣㷫晒啲司機業界，仲未撲到火，點知又爆出被稱為「香港後花園門」嘅大浪西灣事件，變咗火燒後欄，兩頭火舌都燒埋身，又睇下佢點撲火？