呢，有社福團體尋日發表調查報告，批評託管服務嚴重不足，未能協助低收入家庭減輕經濟負擔。預計暑假期間，會出現唔少獨留兒童喺屋企、學童變街童等問題，問你驚未？

全港有約十一萬貧窮婦女因為要照顧子女，無法外出工作，最多只能做兼職。由於託管服務僧多粥少，佢哋抽身無望，難以脫貧。

本來，課餘託管既可以為學童提供一個安全環境，又能夠令家長免除後顧之憂。調查發現，四十六間受訪學校有八成提供功課輔導，但提供託管服務嘅只有一成半，而且服務嘅時間普遍係下午三至五點，大部分喺周末都冇服務。你話嘞，咁對要返工搵食嘅家長，有幾多幫助吖？

當局係就係仲有個「鄰里支援幼兒照顧計劃」，弊在因為宣傳不足，配套唔到位，受惠學童屈指可數，效果麻麻。仲有呀，呢類服務大多數唔包接送，要自己搞掂，家長一樣係甩唔到身，冇辦法搵食，計劃效果打晒折扣。

政府孤寒縮骨，唔肯增加資源，家長惟有焗住幫襯私人課餘託管服務，但呢啲服務每月收費郁吓千幾蚊，試問個個月掹掹緊嘅基層家庭點頂得順？到頭來咪惟有叫細路自己留喺屋企囉。

遺憾嘅係，唔少家長因為「博一博」心態，釀成意外甚至係悲劇。○七年屯門一個家庭因為爸爸通宵開工，媽媽一早上班，將一對小兄妹獨留屋企，期間兩個小朋友貪過癮玩火燒着雜物，全屋盡毀，小兄妹燒至重傷。今年四月，紅磡一個四歲菲律賓裔男童見媽媽外出買早餐未返，喺三樓住所爬出窗墮下，好彩畀帆布帳篷擋一擋卸力，咁至執番條命仔。

獨留兒童，後患無窮。本港近年多次發生涉及幼童獨留家中引發嘅事故，有社福組織歸納出玩火、玩水、玩電掣、爬窗、開煤氣、膠袋笠頭等「十大危機」。好明顯，兒童係家居安全高危一族，如果唔正視問題，分分鐘搞出人命；而流流長嘅暑假，更加係事故高發期。

計太一叮話齋，託管服務不足，受影響嘅唔止小朋友同佢哋嘅父母，仲有成個社會。基層婦女就業難，入不敷支帶來嘅經濟壓力會演變成家庭暴力，令更多悲劇發生，最終受害嘅，都係香港未來嘅主人翁。叮！