香港教育學院校長張炳良尋日出席柏立基教育學院創校五十周年紀念聚會。想當年，教院由五間教育學院合併而成，當中亦包括咗柏立基學院，所以張炳喺致辭嗰陣都不忘感激呢班作為「開國功臣」嘅校友同老師，仲向校友交代教院嘅籌款進度。
張炳透露，目前已為教院籌咗三千五百萬元捐款，但目標係籌得四千五百萬元，所以藉機呼籲校友踴躍捐款。又難怪張炳會公開呼籲嘅，事關各間大專院校校長i爆頭諗新橋「撲水」，正所謂僧多粥少，競爭都好大㗎！尤其依家教院距離目標籌款額仲差一大截，就更加要四圍撲。
提到籌款，張炳就話「大校」嘅籌款方法同佢哋好唔同，人哋就由校友主動拍門要求捐款，佢哋就要校友同校方主動出擊，佢仲話：「人哋啲校友一捐款，徐立之（港大校長）開門伸對手出嚟就拎得。」
佢咁講，即係話港大啲校友自動送上門啦，但教院要出雙倍力去撲水，辛苦過人喇！雖然表面上佢係羨慕徐立之，但都聽得出佢有啲酸溜溜嘅。不過，佢補充，話唔希望只係搵啲嚟自工商界或知名嘅人士捐款，任何人捐款都無任歡迎！