白鴿黨公布同中央政改談判報告，話基本法委員會副主任梁愛詩係中央同白鴿黨嘅「中間人」，而上月十九號搶先以短訊通知民協主席「老虎仔」廖成利，話白鴿黨方案已獲中央接納嘅神秘人，原來係全國政協委員羅祥國。喺今次政改談判中，「中間人」何其多。
當日老虎仔向記者展示手機短訊時，唔夠快手，掩唔住短訊來源係「Law Cheung Kwok CK」。羅祥國九七年以民協成員身份擔任臨時立法會議員，其後退出咗民協，若中央因政改要同民協接觸，由佢做中間人都好合理啫。據聞○五年政改一役時，佢已經做過一次「中間人」，今次終於冇白費工夫。當然，中央嘅主要目標係白鴿黨，「Law Cheung Kwok」嘅角色冇詩姐咁關鍵，不過點都叫有份喺背後出力奔走。
我哋向老虎仔求證，佢不置可否，話自○三年後，中央不同系統嘅人定期同香港政黨接觸，有中間人同民協交流亦好平常咁話。