眾所周知，Francis袁天凡係財經界名人，原來佢除咗喺金融界財技高超之外，玩魔術都好出神入化。前日喺香港及九龍華仁書院舉辦嘅校慶籌款音樂會中，佢表演驚險萬分嘅刀鋸美人，全程手法熟練，贏得全場熱烈掌聲。
Francis係華仁嘅傑出校友，對母校一向好支持，曾經同友人豪捐過千萬元畀學校，今年校慶籌款活動梗係唔少得佢啦！佢話為咗令呢個表演盡善盡美，好認真咁練習咗兩個月，難怪佢喺台上表演時咁熟練。Francis首次登上紅館表演魔術，佢笑言好似發緊夢！
佢同太太Rose一向恩愛，今次Rose都有幫手揀戲服，當晚仲全程陪住老公添！Rose原本係滙豐高層，舊年退休後繼續做滙豐顧問，兩公婆都咁叻，難怪咁合拍啦！