本文重點
一場「變相公投」，泛民主派割裂出兩條路線，主張同中央鬥到底嘅激進派社民連同公文袋，跟溝通派白鴿黨已經成日喺枱底拳來腳往，白鴿黨撐政改方案通過，更被責出賣港人，不斷被圍攻追打。過去兩個星期，白鴿黨罵不還口，打不還手，激進派一隻手掌打唔響，民主派呢塊蟲蛀腐朽嘅牌匾尚算勉強撐住，但相信呢種局面亦唔維繫得幾耐。
反對超級議席又要參選？
消息指出，白鴿黨高層要反咬激進派，起碼有兩招撒手鐧可用，只係為免加深民主派內訌形象，自我克制，如果激進派再苦苦相逼，白鴿黨就會唔客氣。首先，如果公文袋派人競逐二○一二年新增嘅五席區議會功能界別議席，即係超級區議會議席，白鴿黨會公開質問對政改方案投反對票嘅公文袋，既然反對，點解又要參選？尤其當部署出戰嘅人係公文袋黨魁余若薇，余即係喺呢場政改大戰中又食又拎，白鴿黨唔會輕易放過公文袋。
憑乜剝削320萬人投票權？
第二，激進派自封政治道德判官，未審訊已經先判白鴿黨死刑，如果白鴿黨要反咬一啖，可以反問激進派：「你哋反對政改方案，即係代表三百二十萬名喺功能界別無投票權嘅選民拒絕佢哋嘅投票權利，你哋憑乜嘢可以咁做？」
喺政改方案通過後，下一步就係去到選民中間搶票，所以儘管白鴿黨唔想矛盾激化，有啲話未講出口，上述兩件咁有攻擊力嘅武器，遲早都要拎出嚟大開殺戒，相信選舉臨近，泛民之間嘅矛盾就會浮現，到時將再冇必要淡化矛盾，亦冇辦法隱瞞呢啲矛盾。