天文台尋日發出酷熱警告，上水、粉嶺一帶氣溫一直維持喺三十四度左右，而建仔五十人去到粉嶺別墅，仲全程喺戶外，本來戶外活動已經好辛苦，但煲呔曾揀正中午十二點烈日當空下，安排班建仔喺別墅草坪BBQ，雖然搭咗個帳篷遮一遮，亦有廚師煮畀大家食，但諗都諗到當時肯定熱到飛起。據悉，除咗燒烤嘢之外，竟然仲有咖喱雞同炸魚皮，煲呔曾好似慌死唔夠熱氣咁。

據聞，有建仔仲大呼「起錨」開餐，跟住佢應該知錯，因為全部人都食到汗流浹背，真係有苦自己知。再講，雖然有廚師代燒，但對住個火爐唔係講玩，就好似政府宣傳停車熄匙咁「你享受，我難受」，煲呔曾仲衰嘅係損人不利己，竟然要成班建仔焗住陪佢難受，簡直係超錯兼靠害。

整埋熱豆腐花 象哥難頂

建仔主席譚耀宗同立法會議員陳鑑林都好厚道，話好多謝煲呔曾熱情招呼，曾太仲親手做埋熱嘅桶仔豆腐花畀大家食添！但另一議員李慧琼就承認現場真係熱得緊要，佢到場前仲參加咗一個遊行，搞到成個人黑晒。

事後，煲呔曾喺傍晚發表網誌，話充沛嘅陽光，加上出席人士嘅熱情令到BBQ活動氣氛高漲喎。氣氛高唔高漲就唔知，但成班建仔曬到乾就好肯定，有番咁上下磅數嘅「肥根」黃容根同「象哥」黃定光都忍唔住講：「熱呀，真係好熱，食完即走！」連網民喺煲呔個網誌留言：「咁都冇中暑，算你好彩！」

仲話食燒烤喎，煲呔曾根本就係串燒建仔喇，仲話呵番建仔喎，話唔定搞到班建仔「㷫上加㷫」添！本來其他建制派政黨都眼紅煲呔曾厚待建仔，請佢哋去粉嶺別墅食飯，依家見到佢咁「厚待」法，睇怕都大呼好彩，唔使去受罪。