立法會依家就最低工資水平拗到火紅火綠，而唔少飲食集團嘅最低工資連二十蚊都未夠，成為勞方代表口中嘅無良僱主。一向低調嘅大快活集團主席Dennis羅開揚，原來對呢個議題好大方。
Dennis尋日現身集團嘅業績發布會，講到最低工資問題，佢話如果係二十二蚊，根本對佢哋冇影響，因為依家集團平均工資已係二十三蚊半；如果係二十七蚊，約有一千多名員工受影響，但計埋今年加價因素後，都仲應付得嚟嘅！佢話集團有將呢啲意見提交畀政府。
咁三十三蚊呢？佢坦言去到三十蚊以上，經營就會有壓力，又好難同股東交代。不過佢笑謂如果多啲人有人工加，消費力提高，對佢哋快餐店嚟講都係好事！
